अमेरिकाले सैन्य कारबाहीमा पक्राउ गरेका भेनेजुएलाका राष्ट्रपति निकोलस मदुरो र उनकी पत्नी सिलिया फ्लोरेसलाई अहिले न्यूयोर्कस्थित ब्रुकलिनको मेट्रोपोलिटन डिटेन्सन सेन्टरमा राखिएको छ।
उनीहरूलाई अदालतमा उपस्थित गराइने तयारी भइरहेको एक अमेरिकी कानुन कार्यान्वयन अधिकारीले जनाएका छन्। अमेरिकाले शनिबार अप्रत्यासित सैन्य कारबाहीमार्फत मदुरो दम्पतीलाई पक्राउ गरेको थियो। त्यसपछि अमेरिकी सरकारी विमानमार्फत उनीहरूलाई न्यूयोर्क सहरको उत्तरमा रहेको स्टुअर्ट इन्टरनेसनल एयरपोर्ट ल्याइएको थियो।
उही दिन अमेरिकी न्याय मन्त्रालयले मदुरो र फ्लोरेसविरूद्ध नयाँ अभियोग सार्वजनिक गरेको छ। अभियोगमा उनीहरूले आपराधिक षड्यन्त्रमार्फत अमेरिकामा कोकिन तस्करी बढाउने योजना बनाउँदै अवैध रूपमा ठूलो सम्पत्ति आर्जन गरेको आरोप लगाइएको छ।
यसअघि अमेरिकी राष्ट्रपति डोनाल्ड ट्रम्पले भेनेजुएलाबारे टिप्पणी गर्दै भनेका थिए, 'हामी यो देशलाई व्यवस्थित र व्यावसायिक ढंगले सञ्चालन गर्नेछौं। विश्वका उत्कृष्ट तेल कम्पनीहरू भित्र्याएर अर्बौं डलरको लगानी गराइनेछ।'उनले अमेरिकी सेना तैनाथ गर्न सकिने सम्भावनालाई पनि नकारेनन्।
'हामी जमिनमा सेना उतार्न डराउँदैनौं,' ट्रम्पले भनेका थिए। मदुरो र फ्लोरेसलाई राखिएको मेट्रोपोलिटन डिटेन्सन सेन्टरमै यसअघि स्वास्थ्य सेवा कम्पनीका प्रमुख ब्रायन थोम्पसनको हत्या अभियोगमा अभियुक्त लुइजी म्यान्जिओने पनि थुनामा थिए।
त्यस्तै, चर्चित र्याप कलाकार सिन 'डिडी' कम्ब्स र क्रिप्टो उद्यमी साम बैंकम्यान–फ्राइड पनि यसै हिरासत केन्द्रमा राखिएका थिए।
