राष्ट्रिय स्वतन्त्र पार्टी (रास्वपा) बाट रुपन्देही–३ मा उम्मेदवारका नौ जना आकाङ्क्षीहरू सभापति रवि लामिछानेलाई भेट्न ललितपुरस्थित नख्खु जेल पुगेका छन् ।
पार्टीको आधिकारिक उम्मेदवार घोषणा हुनुअघि उनीहरू रविलाई भेट्न नख्खु जेल गएका हुन् ।
रास्वपाबाट रुपन्देही-३ मा उम्मेदवार बन्न ९ जना आकांक्षी रहेका छन् । पार्टीले ७ देखि २१ साउनसम्म उम्मेदवार बन्न आवदेन माग गरेकोमा ९ जना छनोट भएका थिए ।
कात्तिक १७ गते हुने उपनिर्वाचनका लागि आवेदन दिएका व्यक्तिहरूमा सुलभ खरेल बुटवल–१६, पार्थिवेन्द्र उपाध्याय सिद्धार्थनगर–७, डा. लेखजंग थापा सिद्धार्थनगर–९, ज्ञानु पौड्याल सिद्धार्थनगर–८, जीतबहादुर गुप्ता सिद्धार्थनगर–१, कुसुम महर्जन मध्यपुर ठिमी– ६ भक्तपुर, रचना क्षेत्री सिद्धार्थनगर–३, पुनमकुमारी अग्रवाल सिद्धार्थनगर–८ र मधुप्रसाद अर्याल बुटवल–१७ रुपन्देही रहेका छन् ।
उम्मेदवार छनोट कार्यविधि र घोषणाको तयारीका लागि रास्वपाले दिउँसो १ः३० बजे सचिवालय बैठक बोलाएको छ भने ४ः ३० बजे आधिकारिक उम्मेदवार घोषणा कार्यक्रम राखिएको छ ।
यसपटक रास्वपाले ५० प्रतिशत प्रारम्भिक निर्वाचन र ५० प्रतिशत लिडरशिप एकेडेमी, पोल्टिकल प्रोक्जीमिटी र समावेशीबाट उम्मेदवार छान्नेको छ ।
रुपन्देही-३ बाट निर्वाचित राप्रपाका दीपक बोहराको निधन भएपछि कात्तिक १७ गते निर्वाचन आयोगले उपनिर्वाचन गर्न लागेको हो ।
