नेपाल प्रहरीले अवैध रूपमा क्रिप्टो करेन्सीको कारोबार गरेको आरोपमा एक जनालाई प्रहरीले पक्राउ गरेको छ ।

पक्राउ पर्नेमा काठमाडौँ महानगरपालिका-१५ डल्लु बस्ने मोहम्मद सेफ छन् ।

प्रहरीका अनुसार अभौतिक मुद्रा किप्टो करेन्सीको कारोबार गरिरहेको भन्ने सूचनाका आधारमा बारा कलैया नगरपालिका घर भई काठमाडौँको डल्लु बस्दै आएका सेफलाई पक्राउ गरिएको हो ।

प्रहरीले सेफको साथबाट विभिन्न कम्पनीका दुई थान मोबाइलसमेत बरामद गरेको छ। ती मोबाइलमार्फत ठूलो परिमाणमा अभौतिक मुद्राको कारोबार गरिएको आशंका रहेको प्रहरीले जनाएको छ ।

नियन्त्रणमा लिएपछि गरिएको प्राथमिक अनुसन्धानमा १९ करोड ८१ लाख रुपैयाँभन्दा बढी बराबरको डिजिटल कारोबार भएको तथ्य बाहिरिएको छ ।

प्रहरीले अभौतिक मुद्राको प्रयोग गर्न नहुनेसम्बन्धी कसुरमा काठमाडौँ जिल्ला अदालतबाट पाँच दिनको समेत म्याद थप गरी अनुसन्धान भइरहेको प्रहरीले जनाएको छ ।