विशेष अदालतको अध्यक्षमा उच्च अदालतका न्यायाधीश सुदर्शनदेव भट्ट नियुक्त भएका छन् ।
न्याय परिषद्को परामर्शमा शुक्रबार बिहान बालुवाटारमा बसेको मन्त्रिपरिषद् बैठकले अध्यक्षमा उच्च अदालतका न्यायाधीश भट्टलाई नियुक्त गरेको हो ।
न्यायपरिषद्ले विशेष अदालतको अध्यक्षसहित चार जना नयाँ सदस्यहरूको नाम सिफारिस गरेको थियो ।
त्यस्तै, सदस्यका रूपमा उच्च अदालत जनकपुरको वीरगन्ज इजलासका न्यायाधीश नारायणप्रसाद पौडेल, उच्च अदालत सुर्खेतका न्यायाधीश हेमन्त रावल, उच्च अदालत जुम्ला इजलासका न्यायाधीश डिल्लीरत्न श्रेष्ठ र वीरगन्ज इजलासका न्यायाधीश उमेश कोइरालालाई नियुक्त गरिएको छ ।
प्रचलित कानुनी व्यवस्थाअनुसार विशेष अदालतका अध्यक्ष र सदस्यहरू न्याय परिषद्को परामर्शमा मन्त्रिपरिषद्ले नियुक्त गर्ने प्रावधान छ ।
साउन ३० गते बसेको न्याय परिषद् बैठकले परामर्श दिएकै भए पनि मन्त्रिपरिषद्ले करिब दुई सातापछि यो निर्णय गरेको हो ।
हाल विशेष अदालतका अध्यक्ष रहेका टेकनारायण कुँवर भने उच्च अदालत जनकपुरको न्यायाधीशमा सरुवा भएका छन् ।
