आर्थिक मन्दिसँगै गत २६ वर्षहरुकै सबैभन्दा बढी बेरोजगारी समस्याका कारण विश्वको विभिन्न मुलुकहरुबाट अमेरिकामा आप्रवासका लागि आउनेहरुको संख्यामा उल्लेख्यनीयरुपमा कमी आएको छ । आर्थिक मन्दीका कारण विशेषगरी उच्च र निम्न सीपयुक्त मानवशक्तिको अमेरिकी आप्रवास हुने संख्या घटेको हो । मेक्सिकन अमेरिकनहरुले स्वदेशमा पठाउने रेमिट्यान्समा विगत वर्षहरु २००७ र २००८ को क्रमशः २६ र २५ अरब डलरबाट घटेर यस वर्ष १६.४ अरब डलर रही करीब १३ प्रतिशलले कमी आएको मेक्सिकन केन्द्रीय बैंकले जनाएको छ । तर, धेरै मेक्सिकनहरुले अमेरिकामा बसोबास गर्दै आएका आफ्ना आफन्त तथा नातेदारहरुलाई पैसा पठाएर हाल आर्थिक सहयोग गरिरहेका छन् ।
अमेरिकी सरकारले स्वदेशी रोजगारदाताको प्रायोजनमा विदेशी सीपयुक्त जनशक्तिलाई प्रदान गर्दै आएको एचवन-बी (H1-B) भिसाको ब्यवस्था हाल रहे पनि धेरै बिजनेस संस्थाहरु तथा कर्पोरेसनहरु तत्काल विदेशी श्रमशक्ति भित्र्याउन सक्ने स्थितिमा छैनन् । आर्थिक वर्ष २००९ मा एचवन-बी भिसा अन्तर्गत एकैदिनमा ६५ हजार निवेदन परेका थिए । तर, सन् २०१० का लागि भने अझै २० हजार निवेदनहरुको आवश्यक रहेको बताइएको छ । मन्दीले देशमा ल्याएको बेरोजगारी समस्याका कारण संघीय सरकारबाट आर्थिक सहयोग प्राप्त गर्ने कम्पनीहरुले स्वदेशी श्रमशक्तिलाई नै रोजगार दिनुपर्ने बाध्यता रहेको छ ।
आर्थिक मन्दीका कारण मेक्सिकोबाट अमेरिकाभित्र अवैधानिक तवरले प्रवेश गर्न खोज्नेहरुको संख्यामा पनि गत वर्षको तुलनामा करिब २३ प्रतिशतले कमी आएको छ । हाल असंख्य अमेरिकनहरु विदेशी मुलुकहरुमा रोजगारको अवसर खोज्नेहरु बढ्दै गइरहेको युएसए टुडे समाचारपत्रले उल्लेख गरेको छ । देशको सबैभन्दा ठूलो एक म्यानपावर कम्पनीमा कार्यरत ५ सय कर्मचारीहरुले विदेशी रोजगारको चाहना राख्नुले पनि अमेरिकामा आर्थिक सवलताका अवसरहरुमा कमी रहेको पुष्टि हुन्छ । सन् २००५ को ३७ प्रतिशतबाट बढेर यस वर्ष करिब ५७ प्रतिशत अमेरिकनहरुले भारत, चीन, ब्राजिल, दुबई, सिङ्गापुरलगायत अन्य मुलुकहरुमा रोजगार चाहेको तथ्य बाहिर आएको छ । फलस्वरुप अमेरिकामा आप्रवास हुन चाहनेहरुको संख्यामा हाल निकै कमी देखिन्छ । अमेरिकाको गणना विभागले ‘२००८ अमेरिकन सोसाइटी’ बाट हालै प्रकाशित गरेको तथ्याङ्क अनुसार अमेरिका आप्रवासका लागि आउने विदेशी नागरिकहरुको संख्या घटेको देखाएको छ ।
यसैबीच ओबामा प्रशासनले देशमा बस्दै आएका गैरकानुनी आप्रवासीहरुलाई समेत वैधानिकता दिन आप्रवासी सुधार ऐनका लागि गृहकार्य गरिरहेको बुझिएको छ । हाल अमेरिकामा आप्रवासीहरुबीच बेरोजगारी दर १० प्रतिशतभन्दा बढी पाइएको छ । धेरैजसो आप्रवासी कामदारहरु तल्लो दर्जाको पेशाहरु जस्तै निर्माण, उत्पादन, क्लेरिकल, बिक्री, रेस्टुरन्ट, आतिथ्य संस्कारलगायत केही माथिल्लो तहमा कार्यरत पाइन्छन् । ती आप्रवासीहरु औपचारिक उच्च शिक्षाको अभाव तथा अंग्रेजी भाषामा दख्खल नभएका कारण पनि तल्लो दर्जाको पेशा अपनाउन बाध्य छन् । माथिल्लो स्तरको ब्यवसायिक तथा प्राविधिक क्षेत्रमा संलग्न आप्रवासीहरुमा पनि मन्दीका कारण बेरोजगारी दर बढ्दै गएको छ । अमेरिकी आप्रवासीहरुमध्ये भर्खरै कलेजतहको शिक्षा सिध्याएकाहरु बढी छन्, जसले आˆनो विषयगत क्षेत्रमा रोजगार पाएका छैनन् ।
सन् २००० मा अमेरिका पढ्न आई स्नातक तह पास गरेका ३० वर्ष मुनिका आप्रवासीहरुमध्ये करिब ३६ प्रतिशतले मात्र रोजगार प्राप्त गरेका छन्, जसका लागि उच्चशिक्षाको प्रमाणपत्र आवश्यक पर्दछ । बोस्टन शहरमा स्नातक तहमा अध्ययनरत धेरै नेपाली विद्यार्थीहरु भिसाको अवधि बढाउने लहरमा लागेका छन् भने कोही बेरोजगारी र आर्थिक संकटका कारण नेपाल र्फकने तर्खरमा जुटेका छन् ।
श्रोतः अनलाइन खबर
